وحشتني مدونتي قوي
زي الايام دي من شهر كنت بستعد لفرحي و للتغيير الكامل الحصل في حياتي
شهر عدى عليا زي الحلم
زي فيلم بتفرج على احداثه و مش ممكن اكون جزء منه
مشاعر كتير قوي مريت بيها خلال الأيام دي
افقدتني القدرة على التعبير
حلم ... فيلم ...حقيقة ... خيال مش عارفه
المهم انها احداث و بتحصل و مش قادره استوعبها او اعبر عنها لحد دلوقتي
من اول زوجي الي بيهبرني يوميا بوجود انسان بيحمل الكم ده من الحب و الحنان في قلبه
و ان ربنا فعلا عوضني بيه عن اي الم مريت بيه في حياتي
لحد دنيتي الجديدة بعيد عن امي و اخواتي و اصحابي
والمي لفراقهم و لمعرفتي قد ايه انا و حشاهم
و خاصة امي ملاكي و اخويا رفيق دربي
و افتقادي الشديد لأعدتنا الليلية سوا
مع محاولة التأقلم على الحياة في بلد مابيجمعكش بيها غير مشاهد و ملامح لناس كنت بتتفرج عليهم في الأفلام الاجنبية
لدرحة انك تتبسط اوي اما تسمع كلمة عربي بالصدفة هنا و لا هنا
مشاعر كتيرة اوي جوايا
ما بين حنين و حب و افتقاد و فراغ و انبهار و محاولات تأقلم و فرح و دموع ودفى
قدام كل ده مابقتش بعرف اتكلم او حتى اعبر عن مشاعري
-----
اليها هي حبيبتي ... امي ملاكي
افتقدك و افتقد احساسي و انا معك اتنفس نفس الهواء
افتقد نبرة صوتك تملأ وجودي و تحتويني
-----
اليه هو .. فارسي
ارجوك .. توقف عن ابهاري بكل ما بك و منك و عنك
