عم صالح البواب

عم صالح البواب

شخص ماتقدرش تحدد سنه قد ايه من كتر الشقى و التعب الي حفرتهم السنين على شكله وملامحه و حتى صوته و مشيته و طريقة كلامه

كل مره بشوفه فيه بفتكره لابس نفس اللبس , بس اكتشفت مأخرا انها حاجات مختلفه بس طعم و ملامح الشقى اترسموا عليهم هما كمان و فبقوا متشابهين

بيلبس نضاره تخينه قوي ماتعرفش لون قزازها ايه و ماتعرفش هوا بيشوف من عدستها ازاي

بنطلون و اسع عليه و طويل تنيه على قد ما يقدر ملايين خروم و قطع , وعليه قمصان كتير فوق بعضها في عز الصيف معرفش بيستحملهم ازاي و ماعرفش سر انه بيلبسهم كلهم على بعضهم , آخر قميص منهم الي باين صوف و مقطع و متبهدل بالرغم اننا في عز الصيف

اما عن الشوز فهيا مش مقاسه و كبيره عليه و اعتقد انها بلاستك مش جلد

بطنه كبيره , اعتقد انه عنده كبد, مش عارفه , بس من الاخر هو انسان بسيط قوي

دايما بعدي عليه بس عمري ماتعاملت معاه , حكمت الظروف اني اروحله انا و ماما عايزين منه يدورلنا على شقه في المنطقة لواحده قربتنا , لاقيته من قريب مبتسم على طول و هو بيتكلم

قالنا سيبوني كام يوم و انا هبقى اقلكم

عدت فتره و رجعنا نسأله , ماما كانت مقرره انها هتديله فلوس الاول, عشان ياخد الموضوع جد و يدور و كمان عشان شكله بسيط قوي و كمان ياخدهم من غير مانجرح كرامته ,من غيرما يحس انها مساعده وكدا,و قلتها سواء دور او مدورش اديهمله وخلاص , شكله غلبان قوي يا ماما

الممهم رحناله, وماكنش لسه لقى شقه بالمواصفات الي عايزنها, و اتفقنا نعدي عليه بعدين نسأله, و احنا ماشيين ماما بتديله الفلوس

تصوروا كان رد فعله ايه, حلف انه مش هايخدهم لانهم مش حقه وانه لسه مالاقش الشقه و لما يبقى يلاقيها اوك و غير كدا مش م حقه

انا وقفت كنت مزهزله .... و سألت نفسي معقوله يا عم صالح , معقوله دا انت في امس الحاجه لمجرد جنيه حتى والمبلغ الي ماما حاولت تديهله مش قليل خالص

ومع كدا و قف بعزة نفس , ورفض تماما ياخد اي فلوس غير لما يلاقي الشقه غير كدا , مش حقه , وسابنا و مشي و ابتسامة رضى و قناعه كبيره قوي على وشه

من بعدها و انا مابقتش بشوفه غير راجل غني قوي برضاه و عزة نفسه و كرامته, والقطع الي في هدومه معدش ليه أيي وجود