ذلك الملاك

كان قاعد هناك على الرصيف

و في عينه نظره عمري ماهنساها في حياتي

عينه جت في عنيا للحظه

بس اللحظه دي كانت كائنها عمر بحاله

عمر بحاله من التعب و الشقى و الكسره و الحسره

بالرغم من ان سنه مايزيدش عن التسع سنين , بس نظره عنيه كانت نظرة شيخ كسير شاف كتير قوي .. كتير قوي عليه

وشه و ملامحه كانت مزروعه حزن

بالرغم من ان اليوم كان حر بس كان قاعد بردان و في ايد ماسك علبه مبتبهدله زيت اسود والايد التانيه ماسوره حديد طويله اخرها قطعة قماشه بلون الزيت ده بيشحم بيه أبواب المحلات

مش هنسى نظره عينه الي كانت مليانه مشاعر كتير

نظرة ضياع و تيه و افتقاد و عتاب و سؤال و حزن

نظرة حد ضاع منه حاجات كتير قوي

يمكن كان بيدور على طفولته الي ضاعت منه؟؟

على برائته الي اتسرقت منه في وسط مجتمع مش قادر يوفر ابسط حقوق الناس في حياه مش هنقول كريمه و هنقول حتى يتوفر فيها الحد الأدنى من الحياه؟
مجتمع بيدور على أي فرصه في حد أضعف منه عشان يطلع فيه كل كبته و تسلطه و قهره الي اتمارس عليه و عايش فيه

نظرة حد تايه , بيقول هو الطريق فين و لحد امتى؟؟
و لو مشيت لآخره هوصل لفين؟؟
هلعب امتى و هفرح امتى ... هستريح امتى؟؟

نظرة حد مفتقد الأمان و الدفى , بجد كان خايف و مرعوب و بردان في عز الحر

نظرة عتاب , ليا و لغيري و لكل الحواليه

عتاب للمجتمع الي اقل حاجه يوفرها لطفل في سنه انه يكون نايم في سريريه في و قت زي ده

و بالرغم من كده لا بيرحمه و لا بيسيبه في حاله

ده يضربه و ده يزعقله و ده يبصله نظره مش الي هيا

مع انه ارجل من ناس كتير

ليه نبقى احنا كمان عليه؟؟

ليه نعامل طفل كا جريمته ان ظروفه مش كويسه بالطريقه دي؟؟

نفسي في تفسير بجد

بالرغم من انه مسؤليتنا كلنا و هنتحاسب عليه و على الآلاف الي زيه

أرجوكوا يا جماعه أرجوكوا بلاش نبقى احنا و الزمن و ظروفه و ظروف اهله عليه

ارجوكم اتعاملوا مع الأطفال دي برحمه اكتر من كده

ارجوكوا

مالهومش اي ذنب انهم طلعوا لاقوا ظروفهم كده و أهاليهم مش لاقيه تصرف عليهم

و مش الأطفال دي بس , مش بس بليه

حتى الأطفال الي بتبيع مناديل و حتى الي بتجي تشحت

انا عارفه ان كتير بيقولوا احنا كده هنشجعهم و في منهم مجرمين

بس صدقوني الإجرام الأكبر لو احنا كمان بقينا مجرمين معاهم

و اتعاملنا بطريقه مافيهاش رحمه

هنزود اجرامهم وكرههم لكل حاجه

افتكروا دايما انه مش ذنبهم

أرجوكوا افتكروا انه مش ذنبهم

و لو ماقدرتش تتعامل بطريقه كويسه او حد استفذك فيهم يبقى على الأقل اسكت

مش لازم شتيمه و تهزيق و نظرات جارحه

بلاش نبقى احنا كمان مجرمين معاهم



أفتكروا انهم أطفال بجد

ربنا خلقهم أطفال زيي و زيك و زي بنت اختك وابن اخوك و اخوك و اختك الصغيره و وولادك بعد كده

ربنا خلقهم أطفال طبيعين تماما ليهم احتباجتهم و برائتهم و طفولتهم الي المفروض يعيشوها

افتكروا كده و انتوا بتتعاملوا معاهم ارجوكم

افتكروا دايما انهم مسؤليتنا
وكلنا هانتحاسب عنهم
كلنا هانتحاسب عنهم

--------------

إليه هو... ذلك الملاك ذو التسع سنوات الجالس على الرصيف مفتقد لكل معاني الحياه

سامحني

لا أستوعب.. لا أعي... لا أصدق

كالحلم أمضي أيامي الحالية

لا أستوعب

لا أعي

لا أصدق

أنتظر كل ساعة , تلك اللحظة التي سيتوقف عندها حلمي

أصحو يوميا فزعة... هل أنتهى؟؟

لا أعلم متى سأوقن أن كل ما يحدث حولي و لي حقيقة

و هل هو حقيقة حقا؟؟

ربما أحلم الآن

ربما كل ما يحدث هلاوس لا أكثر

متى سيوقظوني

متى سيتوقف كل شيء
أرهف نفسي كثيرا لعلي ألتقط خيط من الواقع

ليخبرني أنه ليس حلما

أو ليقنعني حتى أنه ليس أكثر من مجرد حلم , وسأستيقظ يوما ما منه

أو حتى ليخبرني بأي شيء عن أي شيء

فقط


لا أدري

لا أستوعب

لا أعي

لا أصدق

إنه الله

ما أشقاك الا ليسعدك

و ما منعك الا ليعطيك

و ما أبكاك الا ليضحكك

و ما حرمك الا ليتفضل عليك

و ما ابتلاك الا لأنه يحبك

لكنه ما كان ليؤذيك

إنه الله

-----

سبحان الله و بحمده سبحان الله العظيم

بقعة رمادية من حياتي

تلفني مشاعر غريبه لا توجد لديا القدره على ان اصفها
اشعر احيانا بالصفاء و التجاوب مع كل ما يحوطني
و أحيان اخرى لا ارغب سوى في الاستسلام و ترك نفسي لتغفو غفوة ابديه ارحل بها عن كل ما يحوطني و عن نفسي بالخصوص
لا اعلم ما الذي يحدث تحديدا
لا ادري ماذا اريد
كل ما اعلمه ان هناك شيء مفقود من حياتي
شيء يمنعني من الاستمتاع بكل ما حولي ... بكل ما لدي
اكره استسلامي لذلك الشيء المجهول
احاول مقاومته.... لكنه يتغلب عليا في كثير من الايام .... فيحيلها الى ايام رماديه بارده
بالرغم من انه تمتد اليا الكثير من اشعة الشمس لتدفء تلك الايام
لكن ذلك الشيء الرمادي يقف حائل بيني و بين وصول تلك الأشعة لقلبي
لا اعلم متى سيأتي ربيعي لتنطلق عصفورتي فتغرد تلك التغاريد الربيعيه..
متى سأتمكن من الوصول لداخل قوس قزح أيامي
لا يهمني في أي درجه لونيه سأقف
أحمر أو أصفرأو حتى بنفسجي
فقط مايهمني هو أن أترك تلك البقعه الرماديه من حياتي

إليكِ أنتِ ملاكي

إلى حبيبتي

إلى من زرعت المحبه بقلبي

إليكي انت ملاكي

أمي

كل عام و انت معي

-------

بحماس الأطفال توقظني لتشاركني شيء جديد أعددته لي

أتعجب من طفولتها الرقيقه بالرغم مما تركه الزمن بقلبها

أعشق عينيها التي تشبه عيني طفل يرى الحياة لأول مره

أعشق تفاصيل ملامحها و تفاصيل كل ما تقوم به

لا تتعجبوا ان قلت لكم اني حتى أعشق تفاصيل إعدادها لطبق السلطه
أكاد أجزم أن لا أحد يمكنه أن يعدها بتلك التفاصيل المحببه هكذ لقلبي

تفاصيل تكاد تكون يوميه في حياة الملايين من البشر

.. لكن عذرا يا ساده فهذه تفاصيل و لحظات من عمرها

تفاصيل و لحظات في منح الحب

عمر من سعادة القلب

ربما يكون تحججي بأي شيء كي لا أقوم أنا باعداد ذلك الطبق

... فقط لمشاهدة يديها الرقيقيتين تمسك بأعواد الخضار واحده تلو الأخرى

تنظمهم و ترتبهم و تعتني بهم

و كانما تنقل لنا حبها من خلالهم

اتسائل هل هناك على وجه الأرض من لديه القدره على منح الحب بطريقتها؟؟

هل هناك من لديه القدره على اسعادي مثلها؟؟

هل هناك من لديه براءتها و طفولتها و حنانها؟؟

أشعر كثيرا ان روحي تشبها.. لكن هل يمكن ان تكون روحي بهذا الجمال؟؟

اشك في ذلك

ابدا.. فجمال مثل جمال روحها الفريد لا يمكن أن يُكرر أبدا

أراقب فيها كل ما يقوم به الناس .. لكن أبدا لايمكن أن تكون مثل الناس.

متفرده هي في كل شيء

آه لو كانت الكلمات تكفي.. لأستطعت أن أخبرها كم أحبها

فقط أحبها

-----------

أمي

كل عام و أنتِ أنتِ

:)

هو فيه ايه؟؟؟؟؟؟؟؟؟؟؟؟؟؟؟؟؟؟؟؟؟؟

والله أنا مش عارفه أتكلم في البوست ده و أقول ايه

بس خلاص بجد بقى عندي إذبهلال دائم في مراكز التفكير

وإنبعاج مستمرر في مراكز الإدراك من الي بقيت بشوفه ده

الموضوع يعني

هو انه

في الحقيقه يعني يعني

و من غير لف او دوران او رغي كتير

ومن غير مقدمات غير منطقيه و لا حتى استهلاليه

انه

في حاجه

كده

بتحصل

غريبه و مريبه

مش عارفه اذا كان غريبه و مريبه عندي بس و لا عند كل الناس و لا دي بقيت الموضة و لا بقى عادي و لا في ايه

مش عارفه اقول ايه بـــــــــــــــــــــــــــــــــــــــــــــــــــــــــــــــــــــــــــــــــس

اقلكم .. خلاص مش قايله

خلاص مش مشكله بقى

خليني كاتمه في قلبي و ساكته

خلاص باي بقى

مش لازم اقول بقى

بس لألألألألألألألألألألألألألألألألألألألألألألألألألألألألأ بقى

بوصوا

هواالموضوع بقى

انه

في الحقيقه

هقول اهوووو

اهو والله

طب ثواني

والله مكسوفه بقى ماليش دعوه

طيب طيب هقول

ممكن تفسير قاطع و جاد و يشرحلي و يوضحلي الموضوع الي بقيت بشوفه ده؟؟

الموضوع ايه بقى

خلاص هقول اهو مباشرة

الشباب و الرجاله الي بقوا بيعملوا حواجبينهم زي الستاااااااااااااااااااااااااااااااااات

و منتشره في كل المستويااااااااااات

(احرررررررررررررررررررررررررررررررررررررررراج )

ماليش دعوه بقى

ايه بقى الموضوع يا جماعه

يعني ايه؟؟ هاا؟؟ ايه ؟ ايه؟؟

في ايه؟؟

هوا اذاي بقى بيحصل كده يعني؟؟؟؟؟؟؟؟

تلاقي الراجل ملو هدومه و محترم و يمكن عنده شنب كمان و تبوص فوق تلاقي حاجه عجيبه و غريبه

تخليك تركز اكتر

تقعد تقول هوا فيه ... في حاجه غلط

ااااااااااااه

حواجبك راحت فين يا عمي؟؟؟

انت بتشاور عقلك و لا ايه؟؟

يعني انا زمان اول مالحظتها لاحظتها في سواقين الميكروباس

دلوقتي بقوا ناس عاديه و سن مختلف شباب و رجاله ده حتى الممثلين و المطربين بقوا هما كماااااااااااااااااااااااااااااااااااااااااااااااااااااااااااان

فيه ايه بقى؟؟

حد يقول فيه ايه؟؟

و بجد من غير هذار حد يشرحلي الموقف

ولا ده عادي و بقى طبيعي و انا الي مغيبه عن سمات الرجل الحديث العصري

انا طول عمري شايفه انه الراجل راجل يعني

راجل

رااااااجل

انما توصل لكده؟؟؟؟؟؟؟؟؟؟؟؟؟؟!!!!!!!!!!!!! كتيـــــــــــــــــــــــــــــــــر

و بعدين من وجهة رأيي ده شوه نفسه مش حلااها ابدا ابدا ابدااااااااااااااااااااا

الراجل ... راااااجل

وسامته في رجولته

يعني انشالله تبقى غورله هتبقى كويس برده

سوري على الموضوع المحرج ده

بس حد يفهمني بدل ميفضل عندي انبهاش مستمر في الذاكره كده

أعذرنا ....سنخذلك

بدلا من أن تكون جروح طفولتك اقصى ما بها خدش بركبتك

تصبح جروح طفولتك رصاصه تخترق قلبك

بدلا من ان تكون اقصى مخاوف طفولتك و اجب منزلي لم تقم به

تصبح مخاوف طفولتك رصاصه تغتال امانك

بدلا من ان تكون هموم طفولتك لعبه جديده تود لو ان تحصل عليها

تصبح هموم طفولتك هموم وطن تحت الرصاص



أعلم أنك مازلت طفلا ... و أعلم أنك تتوقع منا أن نحميك ... أن نساعدك .. أن نرجع لك حقك في أن تعيش طفولتك

لكن أعذرنا ... لا تتوقع منا شيئا ... سنخذلك .. سنسلمك

فعيوننا أصابها العمى

قلوبنا أصابها الجفاف

و آذاننا أصابنا الصمم

فلم نعد نسمع سوى الصوت الآتي من بطوننا

فبطونا أصبحت همومنا

و أصبح كل ما يشغلنا هو البحث عن كسرة خبز لأطفالنا

فأرجوك
أعذرنا ... و لا تتوقع منا شيئا ... سنخذلك .. سنسلمك

لكن حتى لو خذلانك و سلمناك فتلك الرصاصه بقلبك ماهي إلا بذرة بطل مقاوم عظيم

هديتي الجميله

يوم عيد ميلادي الصبح لاقيت ماما بتصحيني عشان تديني هديتي الجميله دي

صحتني من عز النوم .. كالعاده

هههههههه

مش عارفه اقول ايه عن احساسها ده بديا

و يا رب اكون كده فعلا زي ما بتوصفيني

ماما .... بحبك

ما بين اليقظة و النوم أسمع زقزقة عصفور وحيد

يذكرني بصوتها هامسا حنونا

حين تسمعه ينقل الفرحة و الدفء إلى اذنيك ثم الى روحك

مابين اليقظة و النوم اتسائل لماذ االيوم يوقظني ذلك الصوت الهامس القادم من بعيد

اتذكر أنه يوم ميلادها

أعتبر يوم ميلادها هو يوم ميلادي

تحسدني جاراتي عليها

يقولون إذا لم تحققي شيئا في الحياة ... تكفيكي روزا

حقا .. تكفيني روزا

فهي تمنح من يحيطها .. ذلك الدفء الفائض بالأمان

عندما أسافر أو أبعد عنها .. أجدني أبحث عنها في الوجوه

يرتد النظر إلى حسيرا .. فأنا لا أجدها في تلك الوجوه

ليست في تلك الوجوه .. فينبغى أن أبحث عنها في الأرواح

فهي تملك روحا .. لا تملك وجها أوجسدا فقط

أعود سريعا لأجدها و كأنما تنتظرني خلف الباب الموصد

تكون أول وجه أقابله

تزول همومي فور لقائها

تبادرني ... وحشتيني يا ماما

-----------

فوق سريرين متقابلين بالأمس.... استلقينا نتبادل الحديث

كعادتها لم تذكر شيئا عن يوم ميلادها ... لم تطلب شيئا لنفسها

فقط ابتسمت

------------------

في طفولتي كان القمر صديقي

أنتظره كل ليله ..يعطيني بعض من ضياءه

انسج من خيوط ضياءه حلمي

و في الليالي التي كان يغيب فيها .. يرسل لي جنيات الخيال

تقص عليا قصص من الأساطير

وتلعب معي في بعض الأحيان

وظللت لأعوام أنتظره من خلف نافذتي المُأطرة بسياج من حديد

يمد لي شعاع من ضوءه

يمسك بيدي

يخرجني من ذلك السياج الحديدي في رحلة على شاطيء نهر من خيال

وطريق تظلله تلك الأشجار الهامسه أوراقها خوفا من أن توقظ الشمس

فيهرب القمر بيضائِه

ولما ارتفعت البنايات حولي ورحل القمر عن نافذتي.. أخذ معه ضيائه

صعدت فوق سطح منزلي ..رجوته ألا يحرمني من لقائه

وعدني أنه سوف يمنحني يوما جزءا من ضيائه

و سيرسل معه يوما جنية من جنيات الأساطير

ومرت الأيام ... ورحل القمر عن سمائي

وظلت جنيات الأساطير تاتيني برسائل من القمر

أسائلها عن وعده لي بمنحي جزء من ضيائه

وذات يوم .... ليلته شديدة البروده

من ليالي النصف الأخير من فبراير

جاءت جنية الأساطير و معها جزء من ضياء القمر وطوق ياسمين

همست لي الجنية هاهو القمر بإذن ربه يفي بوعده

أسجد لله شكرا ...هذه لياليا لم تعد مظلمه

و يكبر الضياء

و يصير جواز سفري إلى بلاد الأمل و البهجة

يصبح كلحن جميل يؤنس وحدتي

كطائر السنونو يصدح بالفرح ويملأ مهجتي

كل عام وأنت بألف ألف خير يا صغيرتي يا طوق الياسمين

يا أسطورة من زمن الحواديت

يا مدن الضياء .. يا زهرة البرتقال

كل عام وأنا سعيدة لكِ و بكِ

----------------------------

مش عارفه اقول ايه بجد بس مرسي اوي يا ماما

اجمل هديه جاتلي

معنديش غير بحبــــــــــــــــك و يا رب اكون عند حسن ظنك فيا

وتمضي الايام

يا ردالللللللله

( ايوه هما نفس الرداله الي ندهت عليهم لما اتنصب عليا )

أيـــــــــــه

شوفتوا البنته روزا عايزه تقول ايه

أيــــــــــــــه

إخواااااااااااااني

تسمحولي بكلمه واحده؟؟

كلمه واحده واماتزوديش

هاااااااااااا

الحكايه مش حكاية كلمه عايزه أقولها

الحكايه حكاية الي ورا الكلمه الي عايزه اقولها

هاااااااااااااا .... إنجزيييييييي

( :( :(.... ده واحد من الرداله .. شخط فيا و أنا بتخض)

طيب تسمعوا الحكايه؟؟

بس قوليها من البداية و في الانجاز عشان زهقنا

(ماشي ماشي مانتوا كنتوا بتسمعوا عبد الحليم من غير ماتسربعوه

(هييه ضحكت عليهم هقول حكاية مش كلمة بس )

ههههههه

هيا حكاية ابتدت من خمسه و عشرين سنه في ليله زي دي و في يوم زي ده و في شهر زي ده بس مش في سنه زي دي

كانت الدنيا ليـــــــــــــــــل و رعد و برق و مطررررررررررر

سكون تاااااااااااام و ليل محاااااااااااااااااال

( هيجي واحد من المغرضين يقولي مطر و رعد و برق معاه سكون تام ازاي , مش هرد عليه , عشان معرفش)

كانت الطبيعة مع موعد جلل

كان القدر بيلعب لعبته في إدارة الحياة

و إذ فجئة و بدون سابق إنذار أو حتى محاولة إخطار

إهتزت الأرض و تلتها السماااااااء

لحدث لم تشهده البشريه من قبل و لا من بعد

كل الطبيعه البشريه كانت متيقظه و منتبهه لهذا الموعد الجلل

الا هيا كانت مستنكراه و قاعده تتفرج على مسرحية يوم الخميس غير مباليه للهيحصل للبشريه بعد شويه

و بالرغم من ان الطبيعه بعتتلها كام انذار في صورة آلاالم متتاليه الا انها لم تكن مباليه

و عماله تقول مش دلوقت

و لما الطبيعه انترفزت و جابتلها هاينت في المسرحيه في صورة واحد قعد يقووووووووول يا عالللللللم مراتي بتولد

يمكن تعرف حل الفزوره

تنبه زوجها النايم جنبها انها احتمال تكون بتولد

و نزل يجبلها الدكتوره لقاها بتولد واحده تانيه

فرجعلها تاني و لأنها اقنعته انها مش بتولد دلوقت .... أصل الدنيا ليــــــل و برد قوي وهي مش في موود ولاده و مش مستعده تبرد فنأجل الموضوع دا للصبح و الصباح رباح

فمهتمش انه يرجع للدكتوره تاني

لكن أبدا تراراررا ابدا مقدرش اقعد اكتر من كده بقالي اكتر من تسع شهور هناك

و قررت ...... اللييللله يعني الليله

و هعتمد على نفسي

و مش مستنيه داكاتره

انا عارفه سكتي كويس

دا انا بقالي تسع شهور ايه هوا انا كنت بلعب

:D

وفعلا انطلقت

بس عشان شغل العيال ده

المجهود الي بذلته لوحدي

نزلت ماحتطش منطق

وافتكروني ميتــــــــــــــــــــــه

ولفوني في قماشه و خلاااااااااص وحطوني على جنب

الاشرااااااااااااار

في عز التللللللللللج

دا انا لسه متلجه من يومها

هوا يعني عشان انا حد مميز و مش بعمل دوشه زي بقيت البيبهات العاديه تقوموا ترموني كدا !!! لن انسى لكم هذا الموقف

فضلت قاعده محترمه و اقول يا بت هيجو يبوصوا عليكي بصه تانيه من نفسهم امسكي نفسك ... لكن مافيش فقلت

أبعبر عن كياني قبل مايسبوني اتجمد كده

رحت عامله حركايه كده

(ياااااااااااه لسه فاكره اليوم ده زي مايكون حاصلي من خمسه و عشرين سنه فاتت )

لقيت ماما بتقول لبابا الحق دي بتتحرك

الحمد لله انه مش دارس طب شرعي ولاحاجه كان قالها دي تشنجات في الجثه بتحصل بعد الموت طبيعي

الحمد لله

راح شايل القماشه وشال الي كان قافل بقي و مناخيري

ورحت مصرخه في وشه

خنقتني يا أبي ... آه أنا مؤدبه مش هقله خنقتني يا أخي

اهو الشويه الي قعدت فيهم من غير اوكسجين دول هما السبب في التخلف العقلي الي عندي

يا سلام دا انا كاان زماني عبقريه لو ماسبونيش كده

وهكذا يا اخواني

من هنا كانت البداية و ابتدى الشعب الحكاية قصدي و ابتدت روزا الحكاية

---------

الدروس المستفاده

الجو بيبقى برد في شهر اتنين و ده لمعلومتكم فقط

روزا كانت ممكن تبقى أكثر زكائا

النهارده عيد ميلادي عشان الهدايه

:D

على جنب كده

صعب قوي ان التقدم الوحيد في حياة الانسان يكون هوه التقدم في عمره بس

لارسال الهداية الكتير كتيرررررر : خمسه شارع حكاية شعب الدور الرابع الشقه الي على ايدك الشمين

:D

كل سنة و انتو طيبيــــــــــــــــــــن

سامِحيني

كم اخشى عليكِ
اشعر انكِ كالوتد المتشبث بأرضه و الجميع من حولك يمد بحباله اليكِ
لا يهم الى اي حد ستتمكنين من الصمود
لا يهم اذا كانت تلك الحبال اكثر من ان تستوعبها قدرتك
لا يهم أي شيء مادمت لازلتِ دليك القدره في نظرهم على ان تتشبثي بالارض
يعرفون انك الان تترنحين من الحمل لاكن لايهم فانت مازلت متشبثه بالارض
اخشى عليك من ان ننتزعك من ارضك
ان نحطمك من فرط شدنا بكل الاتجاهات
اخشى عليكِ و لا ادرى ماذا استطيع ان افعل كي اساعدكِ حتى ولو على التشبث
فانا ايضا احد المادين اليكِ بحبالهم
انا ايضا اجرى بكل اتجاه
انا ايضا قد اكون السبب في تحطمك
لا اعلم مالذي يمكن ان افعله
استمع لبكائك ليلا و لا استطع ان اقدم لك شيئا سوى بضع كلمات حمقاء مكرره اعلم انها لا تجدي نفعا
اسمع بكائكِ ولاسبيل لدي في مواساتك اوحتى التخفيف عنك
اعلم تماما انكِ لا تستحقين كل ما يحدث لكِ
يقتلني عجزي و يقتلني اكثر ان اكون احد اسباب حزنك لكن لاادري ماذا افعل
كل ماتمنيته و كل ما كنت افعله في حياتي كان من أجل ابتسامة رضا و فرح بعينيك
والان لا اجد سوى ابتسامه حزينه
و عيون مبلله بأحمال السنين
اكره عجزي وضعفي امامهما وامام ما تمرين به
لا ادري ماذا افعل
لم اعد ادري ماذا اقول
فما تمرين به اكبر من ان يخفف عنه بضع كلمات بلهاء غبيه
لم يعد لدي سوى دموع تخرج من قلبي و توسل لربي كي يجعلك سعيده كما تستحقين
لكني لا ادري ماذا افعل غير ذلك
أمي ... ملاكي ... ارجوكِ سامحيني عن عجزي وضعفي

تعلمت من التاريخ

هي: ألن ننتهي من هذا الحديث؟؟

صديقتها : لا لن ننتهي قبل أن أقتنع .... لماذا لاتمنحي قلبك فرصه أخرى؟؟

هي : لماذا لا تمنحي أنتِ هذه الفرصه؟؟؟

صديقتها : لدي ظروفي

هي : و أنا أيضا لدي ظروفي

صديقتها : فقط قومي بتلك التجربه

هي : من الحماقه أن أقوم بها مره أخرى .... ألم تقرأي في كتب التاريخ أن ــــ

صديقتها : لقد أفسدت تلك الكتب قلبك

هي : بل أفسدته التجربه .... لا لم تفسده بل أنضجت الحقيقه بداخله

صديقتها : دعيني فقط أشرح لك

هي : بل دعيني أقرأ لك ... فكل ما هو في الماضي مضمون ..... كل ما في كتب التاريخ حقيقه

صديقتها : لكن المستقبل أـــــ

هي : المستقبل به الكثير من الخداع و الماضي يُعتق الحقيقة في قلوبنا

صديقتها : لكن ـــ

هي : فقط إسمعي ماذا يقول الكتاب .... يذكر أن تاريخهما يبدأ بأن يلتقيان ثم يجرحها ....و ينتهي تاريخها عند ذلك السطر من ذلك الكتاب

صديقتها : لكن ــــــ

هي : ليس هناك لكن ... أحمق هو كل من لا يقرأ في التاريخ و أكثر حمقا هو من يقرأ و لا يتعظ

صديقتها : ــــــــــ

Uncompleted Dreams

If I Smile & Don't Believe .....

Soon I know I'll Wake From This Dream

ماذا لو ....!؟

لدي رغبه كبيره , اقاومها منذ فتره في أن أصرخ

أريد أن أصرخ

أصرخ

أصرخ

أصرخ

أصرخ بكل ما لدي من قوه

كثيرا ما تأتيني تلك الفكرة و تلح عليا أكثر في أكثر الأماكن و الأوقات غرابة

أتسائل ... ماذا سيحدث لو قمت بذلك الآن بدون سبب سوى انه

لدي تلك الرغبه الشديده في سماع ذلك الصوت المدوي يخرج من قلبي الآن؟

فقط لأني أريد ذلك

لماذا يتوجب عليا أن أكون متعقله أو منطقيه أو حتى مراعيه ؟؟؟

لماذا عليا أن أختنق بصرخاتي؟؟؟

فقط لأنه من غير المنطقي أن تنطلق صرخاتي الآن

أو أن أقوم بوأد آلامي ؟؟

فقط لأنه من الضعف أن أطلع عليها أحد

ماذا لو تركت لنفسي عنان أمورها؟؟

فلا مجال للمنطق أو التعقل

ماذا لو صرخت .... ماذا لو حطمت ... ماذا لو ثورت ؟؟؟

ماذا لو .. و لو ....و لو .... ماذا سيحدث

-------------

ربما سأعرف الإجابه بعد أن تجدوا تلك المجنونه بجواركم في مكان ما ...مدرج دراسي ... مكان انتظار...او نافذة البيت المجاور لكم تصررررررررررررررررررررخ بلا سبب

فتتركم و على وجهها ابتسامة منتشية بنصر التجربة

كيف تصنع طاغية صغير

من كام يوم لقيت أخويا بيقولي إن صاحيه كان بيساله على واحد أخويا يعرفه و متقدم لأخته وأيه رأيه فيه و كدا ... فلما عرفه قاله لا بلااااااش دا كان خاطب صاحبة روزا و بتقول أنه مش كويس .... صاحبتها إلى إسمها فاطمه فاكرها؟؟ قاله آآآآآآآآه دي الي كانت هيا و أختك شرطه مدرسية و إحنا في إبتدائي

و هنا كانت الصاعقة

يا عينيييي هوا احنا مأثرين في العيال كدا لدرجة إنهم لسه فاكرنا من أربعتاشر سنة فاتت اننا كنا شرطه مدرسية !!!!!!!!!!!!!! قلته ايه يا احمد هوا تأثيرنا كان قوي كدا !!! قالي دا انتو كنتوا جبارين

ههههههههههه

مع اني مش فاكره اي حاجه عن طفولتي المشرده غير إني كنت نسمة عابرة

:D

هههههههههه

مش عارفه ايه الاشعات المغرضه دي و بعدين احنا كنا بنحقق الأمن و الاستقرار في البلد احمم احم قصدي المدرسة

اعدت افتكر كدا اكتشفت فعلا اني كنت مرعبه عشان فاكره اني في يوم و انا بتابع حالة الأمن في الفسحة لقيت بنت صغيره في سنه أولى شعرها إتشبك في فرع شجرة و هيا بتلعب ... و يا دوب فكتلها شعرها من هنا و البنت راحة جرييييييييي هربانه و قعدت تقولي و هيا في قمة الرعب مش هعمل كدا تاني مش هعمل كدا تاني ... يا بنتي هوا انا كلمتك

بس أكيد هيا فاطمه الي كانت مرعبه و عشان احنا ماشيين سوا كانت العيال بتترعب و فكراني شريرة انا كمان

انا .... دا انا كنت نسمه يا جماحه

بس بجد اكتشفت دلوقتي ايه سر الخوف الي بيتزرع جوانا من اي حد صاحب سلطه بالذات لبتوع الأمن.... انا كنت عيله زي بقيت العيال بس شاطره و المدرسين بيحبوني و مشتركه في كل حاجه , رياضه و رسم و مسابقات و ليا شعبيه فطبعا دي احد المميزات الي تأهلني اني امسك منصب قيادي كبير في الداخليه 00000 يييييه قصدي في امن المدرسه

تصورا كدا عيله زيي زي غيري بس حطيت على راسي كاب احمر و في دراعي شريط احمر (ايوه طبعا رتبه امال ايه ) بقى ليا سلطات جامده و اتحكم في العيال زي مانا عايزه

و تتفتحلي كل الأبواب المغلقه و امشي في الأماكن المحظوره , سلطه بقى يا جماعه و حصانه جامده

يعني كان ممكن ادخل عادي جدا جدا أوضة الألعاب و أخد الكور الي عايزاها أو أمشي في أي دور و الفسحة شغالة و طبعا ليا الحق في تعيين المساعدين بتوعي الي كانوا في بعض الأوقات بيزودوها شويه و يرعبوا الناس .. لكن دي ضريبة المسؤليه هيييييه هنعمل ايه بس

:D

سلطات سلطات يا جماعه

بس عشان بكلمكوا كدا و بسبكوا تقلولي روزا كدا بمنتهى البساطه دا بس تواضع العلماء , انما انا كانت ليا سلطات جامده جدا جدا لدرجة اني مرة و انا في رابعه ابتدائي الميس طلبت مني اني اقف على العيال ( و اكيد طبعا مش هقف فوقيهم افطسهم... لا يعني اراقبهم لحد ماترجع) بس فلكم بقى ان تتصورا لما اكون رائدة الفصل من اربع سنين بنتخابات حرة مستقله نزيهه و في نفس الوقت شرطه مدرسيه ايه الي ممكن يحصل يا جماعه

انا راضيه حكمكم

و انا واقفه بقى بعد ما اسنفذت كل طاقتي في الصبر و المحياله و يا جماعه مايصحش و ارجوكوا و الي هيتكلم هكتب اسمه على السبوره لما الميس تيجي هتشوفها .... و الميس مابتجيش

طب يا جماعه الي هيتكلم هيقبى حمار و هنضحك عليه... فيسكتوا طبعا عشان كرامتهم لكن برده بعد شويه الحمار يروح متكلم و بعدها الفصل كله معاه ..طب خلاص الي مابيحبش ربنا يتكلم راح جاي واحد خارج عن القانون و الدين طبعا و راح متكلم .. وهنا كنت جبت آخر موارد الصبر و العقل و الحكمه عندي ...يالك من صنديد رعديد زنديق ... رحت قايله له مش قلت ماحدش يتكلم ... و طااااااااااااااااااااااااخ ................. ايوه هوا كدا بالظبط زي ماتخيلتوا

ههههههههههههه

حتة قلم محترم ( بجد شريرة و مكسوفه من نفسي) على وشه يا عيني اسكت الفصل كله و محدش حط منطق كان يا عيني اسمه سيد راسه مربعه كدا و شعره اورانج اورانج وكان أبييض و عنده نمش , و يا عيني اكتفى بالعياط لانه قال و الله لاقول للميس لما تيجي و لكن بما انه ماكنش شاطرو الي مش شاطرين يقعوا في أسفل المثلث الغذائي للسلطات و القدره على أخد الحقوق ... فانا بسطله بصه طرحته ارضا بعد ان كانت قد رفعته جوا و قلتله و ريني كدا هتقول للميس ازاي ؟؟؟؟؟هو انا مش قلت ممنوع الكلام ؟؟؟ هاااااا؟؟ انت كدا غلطت و لا مغلطتش , قال غلطت

قلت يبقى خلااااااااااااااص

و جت الميس و ماقلاهاش حاجه

شخصيه برده يا جماعه

:D

بعدها بكام يوم تكررت نفس الواقعه بس المره دي لواحد اسمه احمد سمير و كان شاطر شويه فراح قال للميس قالته ايوا انت غلطان و راحت جابه قايلاي لوحدي ماعتمليش كدا تاني

بس و عدى المضوع

( بس لما ماما عرفت ساعتها زعلت مني و فهمتني ان كدا طبعا غلط ) ماما دي غريبه

كله عشان الحفاظ على الأمن القومي بس

:D

ههههههههههههههههه

بس ماتفتكروش إني فضلت كدا على طول عشان في آخر سنه في إبتدائي إتغيروا المدرسين وجالنا اتنين مدرسين رجاله و لما جنا نعمل إنتخبات المدرس صمم إن رائد الفصل لازم لازم يبقى و لد و الأمين المساعد بنت فطعبا مابقتش رائده بنتخبات غير نزيه فاجتلي صدمه نفسيه عشان التفرقه العنصرية دي و إعتذلت العمل السياسي بعد كدا عشان اتيح فرصه للجيل الجديد

:D

---------------------

بجد مش مستوعبه الي كنت بعمله دا و كنت فاكره بجد اني كدا بعمل حاجه كويسه

و فعلا مش مصدقه ازاي يخلوا اطفال يتحكموا في اطفال و يدوهم سلطه يتحكموا في غيرهم و الأطفال بطبعها شريرة

و ازاي يبقى حد زيي زيك مايفرقش حاجه غير اني اديته سلطه و امكانايات انه يتحكم في حد زيه بالظبط

------------------------------------

و في الأخر بليز يا سيد و يا احمد سمير بجد سورررررررري سامحوني كنت شريرة- بس كله عشان الأمن...و أنا مـتاكده انكوا مقدرين

:D

مر عام

الحلم : هو أن تفتح ذراعيك للمدى , وروحك تنظر للسماء .. مغمضاً عينيك
لتعانقك السماء بالمطر
فإما أن تستيقظ لتجد يد ما تحوطك وتأخذ بيدك لتكمل حلمك معها في سلام وأنت مازلت مغمض العينين
أو أن تجدك قد تعثرت في طريقك فأنت مغمض العنين تعتمد على قلبك فقط ليدلك على الطريق
و هكذا دائما ما تكون احلامي و امالي
مغمضة العينين تحركني ثقتي و املي في الآخرين
------------


مر عام الآن منذ افترقنا
كنت على يقين في بدايته من اني في لحظة ما سأنسى أن أتنفس
أو ساستيقظ يوما أبحث عن روحي فأجدني قد ضيعتها أو نسيتها في مكان ما
مر عام أدركت فيه الكثير عنك و عني
أدركت فيه أن من لا يقدر عطائنا لا يستحق حبنا
و أن من تمنحه حياتك و حبك و آمالك فيقابل كل ذلك بضعف و تخاذل فلا يستحق دموعك
لا يستحق سوى ان تتخطاه كما تخطى حبك
----------
استغرب نفسي كثيرا من مشاعري المتناقضه في تلك المرحله السابقة
فمع شعوري بالحزن و الافتقاد شعرت براحه كيبره لانتهاء تلك التجربة
كنت أشعر أني مستنذفة المشاعر
كنت أشعر أني أسبح ضد التيار و حيده
كل ما عليا هو ان امنح و أعطي فقط ... دون التوقف ولو للحظه لاسترداد أنفاسي , أو حتى للتزود بما يعينني على اكمال ذلك الطريق
التزود بتلك المشاعر الجميله التي تقدرنا كي نستطيع الإكمال
أدركت ان كل ما كان بي من ألم لم يكن إلا وليد الصدمه فقط
صدمة المفاجأة
فلم تكن هناك مقدمات.. أو سابق إنذار.. أو أي تمهيد نفسي لأتقبل ما يحدث
صدمة اجهاض الامل
الأمل في اول ارتباط يصل قلبك بآخر
فكنت قد عاهدت نفسي ألا أمنح قلبي إلا لشخص واحد فقط و هو من سأرتبط به إلى الأبد
احتفظ بكل مشاعري فقط لتكون من أجله هو فقط
فكانت الصدمه أكبر من أستوعبها
أكبر من أن أدرك أني كنت سأغتال كل أحلامي بيدي
لو كان قد قدر لنا الاستمرار


و الآن اعتقد اني قد شفيت تماما منك
و اني قد محوت كل جذورك من قلبي
و اطفئت كل نجومك من سمائي

فلم أعد اجلد نفسي بتلك الأسئلة لماذا؟؟ ماذا فعلت؟؟ في ماذا قصرت؟؟
لم اعد أعاقب نفسي على ذنوب لم أتركبها
و لم يعد وجهك يطاردني
لم اعد اتلفت ابحث عنك في وجوه من اقابلهم
بل ان ملامحك بدأت تبهت من ذاكرتي تدريجيا
لم اعد انتظر أي شيء منك
و الأكثر من ذلك اني لم أعد غاضبه منك على الاطلاق


وأعذرني إن كنت لا أقدر على العوده مرة أخرى .... رغم كل محاولاتك المستميته الآن لعودتنا

فبعد مرور ذلك العام أدركت تماما بل و آمنت انك لست لي وأني لا أنتمي لك وأن كل ما كنت أشعر به ماهو إلا مشاعر التعود و فرحة قلب بأول إرتباط فقط لا غير
حتى رمز ارتباطنا , دبلتك لم تعد مقاس أصابعي و بهتت حروف اسمك هي الأخرى من عليها فلم تعد تنتمي لي


والآن عندما اتذكر ما حدث لم اعد ابكي ....فقد بدأت أشعر بسلام كبير داخلي إفتقدته كثيرا مؤخرا ربما نتيجة إطمئنان قلبي أن ماكان لم يكن حب وأني مازلت على عهدي مع قلبي ,فأنا لم أحب بعد
حقا...و عسى أن تكرهوا شيئا و يجعل الله فيه خيرا كثيرا

و أكيد خير :)

تاج التفائل :)

التاج الجميل دا بعتتهولي هنوده الاجمل الي بجد مهما وصفت و قلت بحبها و بحترمها و بقدر مشاعرها قد ايه مش هقدر

بوصي يا هنوده من الآخر بحبك يا بنوته بقى و خلاص

:D

----------

بحس بتفاؤل
لما اصحى الصبح الاقيني لسه بتنفس و قادره اتحرك وكلي سليمه فاشكر ربنا انه احياني بعد ما أماتني واليه سيكون النشور
بحس بتفاؤل
لما اعمل حاجه والاقاي ماما مبسوطه مني قوي , لما في يوم الاقي الفرحه الي في قلبها طله من عنيها لاي سبب في الدنيا الهم تكون فرحانه و مرتاحه وخلاص

بحس بتفاؤل
لما اسمع صوت ضحكة ابن اختي و هي ماليه علينا البيت , و من شقاوته و زكائوه و حنيته و لما يجري عليا و ياخدني في حضنه و هوا يا دوب كام شبر ومش باين من الارض
بحس بتفاؤل
لما الاقي اخويا فرحان و بيضحك و لما يكون في اي مشوار و الاقيه داخل و بيفتح باب الشقه , فاطمن عليه ببقى خلاص مش عايزه حاجه تاني من الدنيا , اهم حاجه انه بخير, ولما افتح اميلي الاقيه بعتلي كارت بيقولي انا ايه عنده ,ببقى في قمة تفاؤلي و سعادتي

بحس بتفاؤل
لما احس برضا ربنا عني و اني حاولت على الاقل ارضيه و لو بحاجه بسيطه و لما احس ان قلبي خلاص مابقاش جواه غير ربنا و حبه و بس
بحس بتفاؤل
لما اكتشف حاجه ربنا كان منعني منها زمان او اخدها مني و اكتشف انها كانت فعلا الخير ليا و انا ماكنتش اعرف , يطير قلبي و يوصل لقمة تفائله , ان ربنا فعلا بيحبني و مابيعمليش غيرالي فيه الخيرليا دايما
بحس بتفاؤل
لما اسمع ان في شباب كلهم خير و امل ,بيكرسوا وقتهم وجهدهم عشان غيرهم بحس بالامل
بحس بتفاؤل
لما اسمع ان فلانه الي جوزها مات دي دا ساعدها في جواز بنتها و دا مخصصلها مرتب شهري من عنده و دي بتدي دروس مجانيه لبنتها الصغيره , وكل الناس الي حواليها بتساعدها و متتأخرش , اتفائل و احس ان الدنيا لسه فعلا فيها الخير
بحس بتفاؤل
لما اقدر اساعد حد بأي حاجه و لو اني حتى اسمعه و بس ,بفرح قوي و احس ان ليا قيمه

بحس بتفائل

لما اقابل حد زي عمو بتاع دود القز .... او حد زي عم صالح البواب

والاقي الناس دي بعزة كرامتها و غنى نفسها

بحس بتفائل

لما حد يفهمني و يعرف روزا الحقيقه من جواها بجد

بحس بتفاؤل
لما احلم بليل بجدي وهو بيحضني قوي و بيقلي ماتخافيش
بحس بتفاؤل
لما اكتب بوست والاقي الناس بترد عليا و فهماني و مش سيباني و يتخرجني من مودي الي انا فيه , وبحس انهم صادقين فعلا في احساسهم معايا , ولما اغيب فتره والاقيكوا بتسألوا عليا و مهتمين لغيابي ,ساعتها ببقى في قمة تفائلي
بحس بتفاؤل
لما اشوف اسره مبسوطه ماشيين سوا و كلهم بيضحكوا ويهزروا بالرغم من بساطة حالهم
بحس بتفاؤل
لما اقابل حد من اصحابي بتوع زمان و نفضل نفتكر لما كنا صغيرين و اضحك من قلبي معاهم

بحس بتفائل

لما اسمع دعوه حلوة من مريض بديله نتيجة تحليل و طلعت سلبيه او العلاج جاب نتيجه , او سحبت منه وموجعتوش فيفرح و يدعلي بجد من قلبه و اشوف فرحة المعافاة من المرض بترقص في عنيه

بحس بتفائل

لما الاقي اتنين كبار في السن ولسه ماشين سوا ماسكين في دراع بعض و من كتر حبهم و عشرتهم بقوا شبه بعض , فاتفائل و احس انه لسه في حب , ان الي بيقول ان الحب بيموت بعد الزواج دا غلطان عشان في ناس قدامي اهي لسه بيحبوا بعض بعد مافات على جاوزهم سنين طويله قوي

بحس بتفائل

لما اسمع عن رحمة ربنا الواسعه علينا

بحس بتفائل

من فكرة وجودكم في حياتي

:)

-----------

و امرر التاج لـ

محض روح
.:.-=- ELGaZaLy-=-.:.
Mr coffee
حكاية ... معرض الأيام
ضد الظلم
هو و هو ... ابراهيم
الدليكون

يوتا البريئة
another rosa Dream
قلوب حائرة
gohaina
هنا الجنة
voice of love
yasmina
عادي بقا
Maichealitoo
Soooo

dr.gisho
كان حلم ليلة صيف
proid
للحب وجوه اخرى
nony`s stuff
واحدة من الناس
روح الفدا
Westtwest
مصراوي اوي
wanna b a groom

ربما الظلام ليس بذلك السوء الذي نعرفه

ربما كل ما يولده الظلام في نفوسنا هو الخوف

و لكن مع الخوف ايضا يولد الامل في قلوبنا

الامل في ان نجد هناك في تلك البقعة التي لا نراها شعاع ضوء و لو بسيط ليخرجنا من خوفنا

أو حتى يد تمتد نحونا لتؤنسنا و تخبرنا اننا لسنا وحدنا في ذلك الظلام

------

----

--

حسنا ربما الظلام ليس بذلك السوء الذي نعرفه

Sick

السلام عليكم

هاااي ... ازيكوا كلكوا

وحشتوني جدا جدا جدا جدااااااااااااااااااااااااااااااا

و سوري بجد اني ماتبعتش المدونه ولا مدونة اي حد في الفتره الي فاتت دي بس كان غصب عني

اخدت حقنايه صغنطوطه بريقه رقيقه لكن طلعت لابسه ثوب الحمل و كشرت عن انيابها ومخالبها بعد يومين , اسقطتني طريحة في الفراش- بحب انا اللغة العربية الجامدة بتاعتي دي بالذات في المواقف-و

طلع عندي حساسية ضدها

بس الحمد لله جت سليمه و عمر الشقي بقي

نتج عنها بس ان ماما قررت تتبرى مني بعد الخضه الي خضيتهالها الفتره دي و قررت تتبرع بيا لاي جهة تقبل التبرعات الي زيي

وتريقه محترمه على وزني الجديد او بمعنى اصح بقايا وزني-قال يعني كان في وزن قديم- هههههههههههههههه

بس عادي عادي عادي ولا يهمني انا اسد

لا بجد كانت تجربه صعبه شويه بس الحمد لله على كل حال و عدت على خير

وسوري اني قلقتكوا عليا

وبجد مرسي مرسي لكل الي افتقدوني و سألوا عليا بجد اول مادخلت ولاقيت سؤالكوا عني فرحت اوي

يلا كنتوا هتخلصوا من روزا و بوستاتها الغلسه

ههههههههههههههههه

و وحشتونيييييييييييييييييييييييييي

لماذا يغيرنا هكذا

هي صديقتي منذ ان كان عمرنا خمس سنوات
كنا لا نفترق و من يرد ان يبحث عني فليسأل عنها , كنا شخصيتان متضادتان كنت اتمتع بالهدوء و هي تمتع بالشقاوة المفرطه لكننا كنا على انسجام تام
تمر الايام بنا فنبتعد لفترات لظروف الحياة أو الدراسه ثم نلتقي كأننا تركنا بعض الامس فقط كأن شيئا لم يكن وهكذا لسنين
ألحت عليا مؤخرا الرغبه الشديده في زيارتها فلم نتقابل منذ 5 أشهر تقريبا و مكالمة تليفون لن تشبعني من شقاوتها و رؤية كل جزء بها يتطاير من الفرحة لرؤيتي
ذهبت لأجدها واحده أخرى تماما
يملأ عينها الحزن و الكسرة فلا اجدها تلك الشقية التي بمجرد ان اجلس معها انسى كل همومي لأرد كما كنت طفله لا تحمل للدنيا هما فابتسامتها و ضحكتها لم تكن تفارقها فهي الشعنونه كما كان يطلق عليها
اخبرتني انها مرت بتجربه خطبه فاشله, تدعي معها انها لا تهتم لهذا الفراق و انها اسعد حالا الآن و انها مرحله من حياتها و قد انتهت و رحلت,

لكن هذا المرحلة التي تدعي انها انتهت .... انتهى معها الكثير منها و من شخصيتها
توقفت كثيرا امامها أنظر لها فلا اجد تلك الابتسامه المفعمه بالحيويه

انظر لعيناها فلا اجد لذلك البريق الذي كان يميزها آثر ... حتى نبرة صوتها الصاخبه المفعمه بالحيويه أصبحت كلمات قليلة تخرج من قلب حزين يدعي الثبات و عدم الاهتمام
اخبرت امي بما شعرت به بعد زيارتي لصديقتي ... فاخبرتني اني الاخرى قد تغيرت كثيرا بعد انتهاء خطبتي انا الاخرى
لم اقاوامها كثيرا .... فأنا على يقين تام من هذا التغير الذي طرأ بي واني تغيرت تماما كما تغيرت صديقتي
لماذا يؤثر هذا الحدث بالذات في حياتنا بهذا الشكل
لماذا يفترسنا هكذا ليأخذ منا ما يميزنا
يقولون ان لا احد يموت من الفشل في تجربة حب
اعترف انه لا يميت لكني ادركت ان الموت ارحم بكثير من ان تحيا بلا هويتك ان تحيا بدون ما كان يميزك و يميز نظرة عيناك قبل ان يدخل حياتك من يسلبها منك
بالرغم من دخول هؤلاء الاشخاص و خروجهم من حياتنا دون ان يتبقى لهم رصيد في قلوبنا الا انهم يحدثون ذلك التغير بنا
يسرقون منا فرحتنا و ما يميزنا , يسرقوت بريق عيننا , و يأخذون معها ثقتنا في الاخرين و يمنحونا في المقابل وجه آخر لا يشبه ملامحنا

و عينان آخرتان تنظاران للحياة بشكل آخر

قلب لا يحتمل عبث آخرين بمشاعره او حتى مجرد الاقتراب منه على استحياء
فهو قلب لا يدري هويته ...اهو لذلك الشخص القديم بكل ماكان يحمله من نقاء و ثقه مطلقه في الاخرين ... ام لذلك الشخص الجديد الذي يتردد حتى في ان يرد تحية الاخرين من شدة خوفه
فيتركك بقايا انسان بلا هوية او شخصيه او حتى جرأه على خوض الحياة
قلب يموت رعبا و جبنا من محاولة عبور اسواره التي لم يدع بها بابا واحدا به من خوفه من ان يحاول احدهم الطرق عليه
قلب لا يملك ان يتذكر نفسه قديما الا من خلال ترديده تلك الحدوته الصغيره عسى ان يستعيد نفسه على امل ان يترك تلك المنطقه الرماديه التي يقف عندها الآن
كان ياما كان كان في عصفور قلبه صغير ... ريشه قصير .. حلمه يرفرف بره الصور كان انسان من طين من نور كان بيدور على الي يخضر قلب الناس القاسي البور
كان ياماكان قلب في حدوته رق و حن... رق و حن على البنوته في زمن اتجن
زمن الناس في قلوبها وحوش... زمن الغاب و الناب و وشوش.... تحزن غشه و تضحك زور
كان ياماكان احلام بضفاير قلب و بس ذنبها ايه لو قلبها طاير حب و حس
بنوته في حدوته جنان و بتجري و راها الايام.... هيا وكل بنات الحور

روزا اتنصب عليها يا ردالللللللللله

يا رداااااااااااااااااااااله

أيـــــــــــــــــــــــه(دا صوت الرداله طبعا) ه

شوفت البنته روزا حصلها ايـــــــــــــــــــه

أيــــــــــــــــــــــه .... دول الرداله برده

في يوم في شهر في سنه تهدى الجراح و تنام و عمر جرحي انا اطول من الايااااا.......... ستوووووب سرحاشان معلش

لاااااا دا عقلي الباطن بس من الي حصلي

انا اتنصب عليا يا جماعه , ايوه اعلنها بمنتهى الصراحة و الوضوح ... كان فين بس الوضوح دا لما اتنصب عليا

احكيلكوا الموضوع

قاعده في امان الله في المعمل بطبع كام ريبورت لسه مشتغلاهم وعشان الحظ الجميل الممرضه الواعية الراسية الي مايجلهاش بالهاريسيا مش موجوده معايا ساعتها .... لاقيته داخل عليا و عمال ينهج وبيعرج و بيستأذن يدخل يقعد

قلت يا سلام ايه الادب و الذوق دا ماكلهم بيدخلوا من غير اي مقدمات و بيقعدوا و يشربوا قهوه وشاي و شاندوشتات كمان و بيقذقذوا لب و بعدين يعبروني

عادي جدا محدش يسالني بليز هوا دا معمل و لا مطعم و لا متنزه عام ولا سكيرتارية الدكتور الي جانبنا ولا ايه النظام ما علينا احنا معملنا في خدمة الشعب ,

نرجع للكابتن الي كان بينهج من شوية و دخل و استأذن و يا ريته ماستأّذن

ااااااااااااااااااااااه

بعد ما قلتله طبعا اتفضل اتفضل استريح ايه فين الرياضه

قالي مانا جايلك في الكلام يا دكتوره اهو لو تعرفي هتعذرني

اهم حاجه نفسية الواحد

قلتله خير ؟؟ في ايه

اولا والدتي بتشكر في حضرتك جدا و و متابعه معاكي هنا في المعمل السكربتاعها و بتقول عليكي دكتوره ممتازه ماشاء الله

و انا بقى لا داعي لا داعي اخجلتم تواضعنا

و دا لااااا حاشا و ماشا و كاشا ازاي دي بتخف بس لما تشوفك

يا .. بلاش مبالغه بقى

دا احنا هنا ساكنين جنبكوا

طب ايه بقى هيا اسمها ايه ,

الحاجه ام محمد

واااو لا في الانجاز بصراحه ماكل الحاجات الي بيجوا هنا عندهم محمد

وعشان ذكائي الاصطناعي مارضتش اضغط في الاسم عشان عارفه الولاد مش بتحب تقول اسم ماماتهم , و ما علينا

المهم بقى احكيلي يا استاذ محمد خير يا تري

طبعا انا زي اخوكي الضغير

صغير مين يا عم دا انت تخلفني مستريح وبعدين بلاش كدا بص على الاحجام يا كابتن ....

لما اذبهلت قال اه صغير في المقام طبعا

لا لا يا استاذ محمد ما تقلش كدا

لحد هنا و عادي جدااااا لان تلات تربع الي بيدخلوا بيحبوا يجوا يحكوا في الاول كدا و يحكوا قصة معرفتهم بالمعمل و مين حلل فين و اولاد الحلال الي دلهوم على هنا فا مافيش مشكله خالص المهم

ندخل في لب الموضوع

بوصي يا دكتوره

و راح موريني ورم بشع ورا و دنه

و مكان جروح كدا في رقبته و دراعه

وانا خلاص يا استاذ محمد كفايه انا مصدقه

ماسبنيش الا لما وراني كل الي في رقبته و دراعه

بسأله من ايه قال الدكتور قال دا كيس دهني و كل ما يشيل واحد يطلع تاني و احد اكبر في حته تانيه و هكذ ا ... انا سمعت كدا و حنفيت عياااااط اتفتحت من هنا مقدرتش امسك نفسي لاني استنتجت الاورام دي ايه

وهوا انا اسف يا دكتوره والله مش قصدي بس عشان تقدري

دا انا لما الدكتور دا ماعرفش يفدني رحت القصر العيني لاقيت هناك دكتوره كدا صغيره زي حضرتك كدا و لما ورتها جسمي قعدت تعيط برده

دا غير ان خطيبتي سابتني لان الاورام دي أثرت على قدرتي الانجابيه

وانا أعيــــــــــــــــــط

وانا عازرها ... انا عازرها و مسامحها هيا برده نفسها تبقى ام

(متسامح صحيح )

و انا اعيــــــــط

دا انا كنت هنتحر من تلات ايام

وانا اعيط

دا انا هاين عليا ارمي نفسي قدام اي عربيه قدامي بس اقول حرام اظلم صاحبها اوديه في داهيه

و انا اعيـــــــــــــــــــــــــط

انا اسف يا دكتوره

و دلوقتي مابقتش بقدر اشتغل ووالدي متوفي و معنديش لا اخ و لا اخت و لااي حد يقف جنبي

وانا ................. ها عارفين طبعا

أعيـــــــط

ارجوك يا دكتوره اقفي جنبي و ساعديني في موضوع التحاليل دا

قلتله شور طبعا انا معاك الي انت عاوزه

قالي لما رحت للدكتوره جيهان قالتلي تعمل تحاليل انسجه و فوجئت بالمبلغ و ماكنش معايا اي فلوس غير حاجه بسيطه دفعتها

ولسه عليا باقي يندفع لما اروح استلم النتيجه

و ان اعيــــــــــط و زي العبيطه لسه برده مش فاهمه اي حاجه و مستنيه بقى يقلي اسم التحليل الي محتاجه عشان اعملهوله و اطمنه و اطمن عليه

لاقيته بقى بيقلي انا هطلب من حضرتك طلب بس يا ريت ماتحتقرينيش

وانا اتفضل لا ارجوك ماتقلش كدا خيـــــــــــــــــــر

لاقيته بيقلي لو سمحتى بس بقيت فلوس العينه ادفعها للتحليل الانسجه دا و انا واللللللله وحياة الشهر الكريم دا اول ما اقبض معاش والدي يوم عشرة الشهر هجبهوملك تاني , وخدي اي ضمنات بطاقتي كرنيهي اي حاجه

و انا بقى استكمالا للعبط , لااااااا ماتقلش كدا بلييييز من غير ضمنات ولا الكلام دا

و رحت فاتحه شانطتي و فضيت كللللللللل الي فيها ادتيهوله زي الهبله لا زي المغفله

صحيح القانون ليه حق مايحميش المغفلين امثالي ههههههه

بس

و قلتله دول كفايه؟؟؟

قالي اي حاجه مش مشكله مش مشكله

و راح و اخدهم و شكرا يا دكتوره و سلام

سلام

و انا اعيييط و اعيط و دخلت اصلي و ادعيله ان ربنا يعوضه خير و يكون الموضوع بسيط

دا لسه في عز شبابه

المهم يا جماعه بعدها بساعه كدا وانا مازلت على حالتي السابقه من النهنه و الشنهفه و البكبكه ( ماحدش يقول ايه يعني ايه بكبكبه لو سمحتو هيا اكيد احد مشقات البكاء ... كفايه الي حصلي بقا ) قلت اقف في الشباك ادعيله ربنا شويه و اخفف عن نفسيتي الملتاعة بالام و الحزن والاسى و العيـــــاط عليه لاقيته يا اخواني ماشي في الشارع بمنتهى النشاط و الهمه و العرج الي كان في رجله رااااااااح راااااااااااااااح قلت يا حلولي دا شكله اتعالج و خف هههههههههههه

لا طبعا ماقلتش كدا انا اذبهلت و استجمعت كل قوايا البلوليسيه و وركزت بنظري لحد ما بقى ثاقب ماص و راقبته رايح فين لاقيته يا اخواني ماشي يبوص على يوفط الداكاتره و المعامل الي حوالينا واحد واحد و يطلع فوق شويا و يقعد بتاع 10 دقايق زي الي اقعدهم و نازل يا منشكح يا منكشر( منكشر دي طبعا كشر يكشر فهو كاشر مكشر يعني من الاخر ) و هكذا بطول الشارع

كان هيجيلي سكته نفسيه حاده

كدا يا استاذ محمد , يا ابن الحاجه ام محمد دا ماكنش عياط و شنهفه الي بينا دا انت طلعت شريــــــــــر

وهكذا كانت حكاية اول نصبايه اتعرض ليها في بداية حياتي العملية في المعمل

كل لما احكي لحد بيقعد يضحك و انا بقلبها هذار , بس بجد من جوايا اكتئبت و زعلت كتير قوي

فين حرمت الشهر الكريم الي هوا فيه دا , لا و منفعل قوي و انا بهذر معاه اول مادخل و بقله انت صايم ولا ايه و يقلي عيب با دكتوره الا الصيام دا انا ممنوع و ممنوع جدا من الصيام بس الا طاعة ربنااااااااااااا

وانا اواسيه و اقله دا يوم القيامه الي ربنا ماكنش جاعلهم من اصحاب الابتلاء هيتمنوا لو كانوا مبتلين عشان ينالوا مقدرة المبتلين الصابرين يقولي ماهوا الايمان و الصبر و ربنا الي مصبرنا

يا ربببببببببببييييييييي

قمة النفاق و الخداع و انعدام الدين والضمير

يمكن العيب مني اني ماكنتش واعيه كفايه , بس مش قادره اتخيل ان حد يتبلى على نفسه بالمرض او لو كان مريش فعلا و لو اني اشك انه يتاجر و يسرق بمرضه

يلا كل نصبايه وانا طيبه و هبله و عبيط كمان

خلو بالكوا بقى

و رجاء يا جماعة بليز الي يعرف الدكتورة جيهان الصغيره زي الي في القصر العيني يقلها لما محمد يروحلها تبقى تقله ياخد فلوس كفايه معاه وهوا رايح يعمل التحاليل و بلاش تعيــــــــط عشان انا بعيـــــط

و انا اعيــــــــــــــــــــــــــــــــــط

:)